Jæja þá og góðann daginn! Við gáfumst upp á skertum tengslum við umheiminn og Arnheiður splæsti í svokallað „VPN“, sem tengir okkur netinu í gegnum netþjóna sem hýstir eru utan Kína, og veita þannig aukið öryggi og óritskoðaðan veraldarvef. Sem þýðir facebook og blogg hjá okkur tveim!!
Seinasti fimmtudagur var seinasti dagurinn okkar í Hong Kong, og honum eyddum við í tiltölulegum rólegheitum um borð í bátnum, elduðum okkur kvöldmat og áttum góða, ódýra stund saman. Morguninn eftir fórum við í morgunmat til Strúllu, Bjarki var því miður farinn til Kína, og við náðum ekki að kveðja hann. En við náðum heldur betur að kveðja börnin!
Síðan drifum við okkur í metroið alla leið að landamærunum, og fórum þangað í gegn á örskotsstundu, tókum metroið á lestarstöðina og fórum beinustu leið í miðabiðröðina. Eftir langa bið fengum við þær mjög óvæntu og óskemmtilegu fréttir að lestin til Guilin var full! Og við sem áttum bókaða gistingu þar um nóttina. Og gmail virkar ekki í Kína svo ég gat ekki látið hostelið vita!
Sem betur fer var þarna maður á vegum einhvers rútufélags, sem sagði okkur að við gætum tekið rútu til Guilin. Það var næturrúta sem tók ekki nema 11 klst. Lengur en hraðlestin. Og það var allt frekar sketchy í kringum þessa rútuferð, og ég hélt á einum tímapunkti að ég yrði skilinn eftir einhversstaðar útá landi. En svo var ekki, og við komumst til Guilin einum degi á eftir áætlun! Vegna tafa lengdum við dvölina um tvær nætur, og höfðum því þrjá daga í Guilin. Við röltum um bæjinn, og smökkuðum góðann mat og leituðum okkur að hlýjum fatnaði, þar sem þetta var kaldasti staður sem við höfðum heimsótt.
Það hlýnaði þó eftir fyrsta daginn, og við fórum í siglingu um mjög fallegt landslagið í kringum Guilin. Siglingin átti sér stað á nútímavæddum bambusfleka. Bambusinn var s.s. úr plasti. Það var engu að síður fallegt, og veðrið var óviðjafnanlegt, svo að við náðum mörgum fallegum myndum og þónokkrum óviðjafnanlegum mínutum!
Þessi sigling hófst með rútuferð útúr Guilin í átt að einhverri bryggju við ánna, sem tók u.þ.b. 2 tíma með hinum ýmsustu flækjum og skrítnu augnablikum. Það kom enskumælandi maður á hostelið okkar að sækja okkur á svona minivan bíl, en þar voru bílstjóri og 6 aðrir kínverjar, sem enginn talaði ensku. Síðan fór enskumælandi maðurinn, og sagði okkur að stoppa eftir smá stund og ná rútu nr. eitthvað sem ég man ekki alveg. Við stoppuðum, en svo sagði bílstjórinn eitthvað á kínversku og hoppaði aftur uppí rútuna, ásatm hinum kínverjunum. Okkur var bent á að koma með, og við gerðum það. Síðan átti bílstjórinn í miklum samræðum í símann á leiðinni, þar til á endanum stoppuðum við á einhverri bensínstöð. Þar vorum við stopp í góðan hálftíma, ekki vitandi neitt þar sem enginn gat sagt okkur eitt né neitt á ensku. Við vorum hálf stressuð á þeim tímapunkti.
Á endanum kom síðan rúta með númerinu sem enskumælandi maðurinn hafði sagt okkur að fara uppí. Við drifum okkur uppí, og þar var loksins manneskja sem talaði ensku sem gat sagt okkur hver staðan væri! Staðan var fín, og við vorum send beinustu leið í siglingu! Myndir segja víst meira en þúsund orð..
Eftir siglinguna var okkur keyrt til Yuangzhou, og fengum að fá okkur 40 mínútna göngutúr á rútustöðina til að ná rútunni til Guilin. Allt tók þetta alveg mjög heilan dag, með þremur rútum og bát, svo við fórum heim í staðinn fyrir fína lókal matarmarkaðinn.
Daginn eftir ætluðum við að skella okkur í helli, og tókum almenningsrútun þangað og fórum í stutta siglingu, en slepptum svo hellinum þegar í ljós kom að hann kostaði alveg rosalega mikið, svo við létum okkur nægja fallega landslagið í kring, og siglingin á fallega vatninu þar nálægt, sem var hræódýr.
Svo þurftum við barasta að drífa okkur á flugvöllinn í flug, þar sem lestarnar voru allar uppbókaðar og okkur lá á að komast til Shanghai og Pekíng til að sækja um rússneska vegabréfsáritun. Í Shanghai tók svo við löng og skemmtileg leit að hostelinu okkar með leigubílsstjóranum.
Morguninn eftir drifum við okkur til rússneska konsúlsins í Shanghai. Fórum eldsnemma á fætur og þurftum síðan stærsta partinn úr morgninum til að finna það. Það var að sjálfsögðu lokað, eins og venjulega á þriðjudögum og fimmtudögum, svo við fórum að labba um borgina í leit að búð með ódýrum úlpum. Fundum ekkert slíkt og fórum því vel þreytt uppá hostel, Shanghai er falleg og skemmtileg borg þó að maður finni ekki það sem maður ætlar sér. Um kvöldið kynntumst við Rochelle, sem var með okkur í herbergi, og ákváðum að við myndum hitta hana daginn eftir, þegar við værum búin hjá konsúlnum. Hjá konsúlnum fengum við þær fréttir að við þyrftum að bíða í 10 daga eftir vegabréfsáritun, og ef við færum til Pekíng fengjum við hana mjög líklega bara alls ekki, svo við erum föst í Shanghai til 24. apríl og missum af Pekíng partinum af síberíuhraðlestarferðinni okkar.
Við fórum nú samt og hittum Rochelle, sem hafði fundið frakka að nafni Chloe, og fengum okkur hádegismat og fórum svo með þeim á hið stóra og mjög áhugaverða Shanghai Museum. Það var skemmtileg sjón.
Daginn eftir tókum við morgninum bara soldið rólega áður en við héldum á hið lítt þekkta „Propaganda Museum“, sem er safn af kínverskum áróðursveggspjöldum frá allri tuttugustu öldinni. Það veitti mjög sérstaka og skemmtilega sýn á sögu Kína undanfarna öld, og er eitthvað sem við mælum hiklaust með, þó að það hafi verið soldið erfitt að finna það. Það var einmitt hún Rochelle sem fékk okkur til að koma með sér á það, hún var með okkur allan þann daginn líka, og svo voru öll dorm uppbókuð á hostelinu um kvöldið, en við gátum reddað því með því að bóka tveggja manna herbergi með aukarúmi, og gistum þar öll þrjú saman.
Við erum búin að vera í dulitlu veseni hér í Shanghai. Við erum semsagt föst hérna til 24. apríl útaf þessu visa-stússi hjá rússunum. Og við erum ekki með nein vegabréf, rússarnir eru með þau. Og svo virðist vera að hér í Shanghai verði maður að vera með frumrit skilríkja til að geta checkað sig inn á gististöðum. Þar af leiðandi verðum við að vera hér á þessu hosteli allan tíman okkar í Shanghai. En svo óheppilega vill til að öll herbergin hér eru fullbókuð fram á þriðjudag í næstu viku. Starfsfólkið hér er samt mjög indælt, og hefur sett okkur á biðlista þannig að þegar einhver afbókar fáum við það herbergi um leið, og ef enginn afbókar munum við fá að sofa á mjúku sófunum hérna niðri á veitingastaðnum/hangiaðstöðunni. Svo þetta reddast svona nokkurnveginn.
En já. Það er allt í bili.
Tómas Ari Sætamús skrifar frá Shanghai.
Elsku börn, þetta er ekki hægt að vera svona á vergangi! Viljiði gista í íbúðinni í Taicang ? Ca 1-1,5klst frá SH…
Líkar viðLíkar við
Heldurðu að við séum ekki bara komin í þetta fína hostel herbergi sem við fáum að vera í alveg þangað til við förum til Rússlands, og það á spottprís! Þakka samt gott boð. Það hefði verið ágætt að breyta um umhverfi, erum orðin óvön því að vera í svona marga daga á einum stað.
Líkar viðLíkar við